زواج الخواطر.... دعوة للنقاش..!!

[العسل]

السلام عليكم ورحة الله وبركاته

ماكان بنيتي اطرح هالموضوع ولا ظن انه كان ممكن يجي على بالي انزله بالمنتدى...


لكن بسبب اللي صار لواحده من صحباتي وهي اعز صديقة لااختي هو اللي خلاني انزل هالموضوع هنا اليوم..،،


الكلام وعلى لسان اختي منزلته بمنتدى ثاني :

كيف الحال لكل من يقرء موضوعي اليوم .....

صحبتي واعز صديقاتي انباعت بالرخيص ولا يمكن ببلاش ....

نعم هذا الواقع .....

هي فتاة كأي فتاة انجبرت من الزواج لابن عمها قبل اربع سنوات تم عقد القران وكافأها والدها على هذا الزوج بالسماح لها باكمال دراستها ومرت الاربع سنوات خلالها حاولت واستماتت لفسخ النكاح ولكن خوفها على والدها وشراء لخاطره .... استسلمت...
ولم يحاول هذا الزوج ان يرفع سماعة الهاتف ليطمئن عليها.....
وتم تحديد الزفاف لتكتشف ان هذا الزوج وبكل وقاحة يقول لها لقد تزوجتك فقط لأذلك ....
واخبرت اهلها لتكن المصيبه الكبرى بقول والدها ستتزوجيه شئتي ام ابيتي .....
اي اب هذا الذي اشتري خاطره وهو لم يخاف على ابنته ....

وتزوجت صحبتي قبل اسبوع بالضبط ومن اول يوم ويعلم الله انني لا ابالغ اهانها وضربها اربع مرات ومن هذه المرات 3 ساعات متواصله بعلاقة الملابس ...

اشفقت عليها وحاولت ان اقنعها انها تذهب لدار الرعاية وتشتكي ظلم اهلها الذين قالوا لها بكل بساطة تحملي احنا ما نبغى فضايح اش هايقولوا علينا الناس لمن ترجعي من ثاني او ثالث يوم من وجهة نظرهم عملوا اللي عليهم ودوها المستشفى وجرجروها على بيت زوجها استماتت ولا حياة لمن تنادي...

اليوم صحبتي ارسلتلي صورها بعد الضرب تعرفوا والله ياخواني ماينشاف شيء من وجهها كدمات حمرا وزرقا شيء محزن ....وهي التي تشتهر بجمال الخلق والاخلاق ...

وللأن خايفه على اهلها بالله يستحقوا ان يخاف عليهم وعلى سمعتهم وهم اللي باعوها لوحش الله واعلم بغرضه من هذا الزواج ......

قلتلها تعالي عندي البيت ونروح المستشفى ونعمل محضر تعدي وبالأخير مراح يسلموكي لاهلك الا وهم ماخذين تعهد ويمديكي تطلقي من هذا الرجل الذي تجرد من الانسانيه ...

ولكن مازالت شاريه اهلها بالغالي جدا .....

اي اهل هؤلاء واي زوج هو امازال يعيش بيننا من يبيع بناته .....


ما اقول الا الله يهدي حالها ويصلح بالها

مدري وش اقول لكم
ابيكم تحكمون بضميركم زواج الخواطر المفروض انه انتهى مع عصر جدي وجدتي لكن للاسف اظاهر انه مازال بينا ومنتشر والبيوت اسرار

اكيد كل واحد فينا عنده مثال او قصة..؟؟

لكن انتم بينكم وبين انفسكم

هل ترضونه لنفسكم او لابنائكم..؟؟؟

انا عن نفسي حاولت على قد مااقدر وطوال سنة ونصف اقنع هالبنت بفسخ الملكة لكنها شرت اهلها اللي باعوها..!! وباعوها برخيص..!!

ابوها باعها عشان يشتري خاطر اخوه وولده..!! (عجبي على كذا اهل):(
والمرة الثانية باعها عشان الفضائح قدام الناس

اوكي انا معة بالبيعة الثانية لاني لو مكانه بامانه ماراح ارضى ان بنتي تطلع من بيتها ثاني يوم زواجها

بس كمان هو غلطان سكت عن ولد اخوه مامسكه ووقفه عند حده الا امر بنته انها تطيع الولد كنها جارية له.. :(
وزمن الجواري انتهى من 1428 سنة

متى راح نتعلم تعاليم دينا الحنيف ونطبقها..؟؟
متى راح نقدر اولادنا ونقدر مشاعرهم واحاسيسهم ونوقف زواج المجالس والخواطر..؟؟
متى نؤمن ان كل نفس لها طبيعتها واحتياجاتها واننا مانقدر نفرض كوب عصير على احد فما بالكم بزواج روحين نسجنهم سوا (فرضا ماتوائمو سوا ) وش بتكون النهاية.. مشاكل عائلية..؟؟ محاكم..؟؟ قطيعة رحم..؟؟ طلاق .. ؟؟ تشتت لاطفال مالهم ذنب الا انهم نتاج زواج خواطر،، مصالح،، صالونات،،..؟؟
متى بنفهم ان الزواج الفة ومحبة ومودة .. مو شركة لانتاج الاطفال وتربيتهم وجعل المنزل مقر لهذه الشركة المليئة بالمشاكل ،،والصراعات وللأسف اوقااات بالخيانة :( من الطرفين ( كل واحد منهم بيحاول يشبع احتياجاته العاطفية بعيد عن الثاني) والامثلة ومن الواقع كثيرررررر :(
.. وبالنهاية انتاج جيل مريض نفسياً... فاقد حب.. فاقد حنان .. فاقد امان.. وعلى هذا المنوال تتعاقب الاجيال

بجد مااتمناها لا لنفسي ولا لاحد قريب مني..
وبحمد ربي ان اهلي متفاهمين وياليت كل العوائل تفكر مثل مااهلي يفكرو
كان مشاكل كثير احنا بغنى عنها انمحت ومالها اي اثر..

انتظر مشاركاتكم وارائكم:)

تحيتي لكم

[THE CHIEF]

اختي العسل
هذه البنت مأجورة لأنها صبرت وتحملت المر من اجل اهلها ولكن الاب
هل فكر ولو للحظة انه لما بنته تنهان هذا معناه انه شخصيا انهان وان هذا الزوج ما يستحق بنته
اوكي اذا هو يخاف من الفضايح ما يفكر باجر لمن يوقف امام الخلق كلهم والله يوريهم ظلمه على بنته
ولكن هذا حال اللي يخاف الناس ولا يخاف الله

[ليل]

.
.

حجز مكااان
الموضوع يستاهل قعده
لأن بجد يستاهل نقااش بضمير
راجعة بإذن الله عسوله

.،

[ليل]

.
.


الله يعينها
قصتها بجد تعور القلب و مافيه أصعب من أنك تنتظر أهلك يصيرون لك عزوه وسند
وفي النهاية يتخلون عنك لشكليات تافهه اكتسبناها من مجتمع اتفه

الأنثى في مجتمعنا مظلومة
صدقيني مهما كانت مدلله و دلوعة و طلباتها أوامر على الكبير قبل الصغير
في تفاصيل تتدخل فيها العادات تخلي كل هالدلال و العطف على جنب
ويكون القرار لكبار العيلة
كل هذا علشان عرف قبلي قديم قدم الديناصورات
أن البنا مايتزوجها غير واحد من عايلتها حتى و إن كان مليااان عيوب
علشاان لا يختلط نسب العيلة بنسب ثاني !!!!!!

دائماً في بالهم أن الحب و العشرة و التعود راح يجي بعد الزواج
وكأنهم هم إلي راح يعيشوا هالحياة ... مو هالمظلومة ... !
والمشكلة أنهم يتبروا من تبعات هالزواج
و في الأخير هي إلي راح تدفع الثمن في البداية و النهاية !!

الله راح ياخذ لها حقها هي و أمثالها
بس المصيبة أن حقها في رقبة أهلها ... !!

موضوع يوجع القلب لأنه منتشر و ماله داعي نلبس نظارة سوداء
ونغض النظر ونقول العالم تطوورت
في ناس وقبايل يمشي في دمائهم تخلف الجاهلية إلى الآن ...
ويمارسون وأد البنات و إن كانت بطريقة جديدة !!


شكراً العسل
وبجد الله يعينها

.،

[العسل]

المشاركة الأصلية كتبت بواسطة the Chief [عزيزي الزائر يتوجب عليك التسجيل للمشاهدة الرابطللتسجيل اضغط هنا ]

اختي العسل
هذه البنت مأجورة لأنها صبرت وتحملت المر من اجل اهلها ولكن الاب
هل فكر ولو للحظة انه لما بنته تنهان هذا معناه انه شخصيا انهان وان هذا الزوج ما يستحق بنته
اوكي اذا هو يخاف من الفضايح ما يفكر باجر لمن يوقف امام الخلق كلهم والله يوريهم ظلمه على بنته
ولكن هذا حال اللي يخاف الناس ولا يخاف الله

هلا بك اخوي

نورت صفحتي وتعقيبك على موضوعي

بالنسبة لتعقيبك عن الخوف من الفضايح

صدقني من همه كلام الناس ماعاش

لانه ايش ماسويت الناس ماراح تسكت بتتكلم تتكلم في الشر تتكلم وفي الخير بعد بتتكلم لازم تطلع فيك عيب عشان يحكون عنك فيه

رضى الناس غاية لا تدرك


مشكور على مرورك مع انه كان نفسي تناقش معي سلبيات زواج الخواطر

تحيتي لك