مواطن

[صدى الصمت]

مواطن


ماعندي موضوع اتكلم عنه .. لأن المواضيع كثيرة .. وامر الله شق القربة

ودي اتكلم عن عشرين حالة في صفحة ونص .. بس المشاكل مايكفيها قرطاسة ولفّ ورق ..

عِندما تزقزق العصافير على أجواء صباحٍ جميل فالتعلم أنكَ لزوم تلبس ثوبك وتلف شماغك وتذلف لعملك وتدقّ لطمة قبل تطلع مع الباب لأن أجوائنا بالرياض " أجواء متقلبة " وكل يوم شي جديد وغبره جديده وريحه أوّل مرّة تشمها !

هيئة الأرصاد وحماية البيئة تحذر المواطنين من كومة غبار متوجهه للرياض !
هيئة الأرصاد وحماية البيئة تتوقع هطول أمطار خفيفه بعد غدٍ مسحوبه برعود على شمال وجنوب الرياض ، ويمكن تلفح شرقها وتمرّ على سوق حجاب !

لا مطر جانا ولا غبار كفانا !

هيئة الأرصاد .. كرسي وخبر ومتعرّفين على صحفي بجريدة الرياض عشان يجيب طاريهم كل شهر بالجرايد ويحسسون المجتمع أنهم يشتغلون ويفرمون ورق بالفرّامة كل صبح في مكاتبهم !

مدري ليش بعض المؤسسات الحكومية ماخذه ميزانية على غير سنــع ..

إذا هي هيئة فـ حنا ياحبيبي مانبي منها تصاريح .. نبيها تجتهد وتنزّل بالوسائل الإعلامية كيفية الوقاية من هالسموم اللي حطّت في تسبودنا شحن رمل وخلتنا ندخّن من فوق ومن تحت يادافع البلا



نبي منها قول وفعل وجوهر !

على طاري " جوهر " .. يقولون انهم شالوا ناصر الجوهر من المنتخب !
طيب ياناصر ياحبيب قلبي .. أبي طربوشك هاللي من عرفتك مدرب المنتخب وانت لابسه هههههههه .. ودي اشخّص به قدّام ربعي واقول وش رايكم بهالقزوعيه اللي كنّها خبزة مفرود مليانه زعتر ..

ناصر الجوهر ..
علامك تدهور منتخبنا ؟

أجل تحط لي كومة دفاع قدّام هاللي عيونهم مجنخره وناسين شي اسمه " هجوم " .. اعنبوا بليسك آلحين شلون تبينا نروح لكاس العالم وفريقك كلهم اثنين دفاع ثلاثة دفاع خمسة دفاع !
لا وذيك التصاريح اللي كاتبينها الإعلاميين بالجرايد قبل المباراة " سندكّ صروح الكوريين " والا " سنهاجمهم في قعر دارهم " ههههههههه امشششوا والله لو انكم بتحاربون كوريا على هالتصاريح كان دقينهم دقّ الهيل



عالعموم .. هي الدنيا دروس ولازم تعرف ان المنتخب بحاجه إلى ترابط دفاع مع وسط مع هجوم .. مهوب تربط لي الدفاع بالوسط كنك رابطن صدّام موترك بحبل لايطيح ومخلي الهجوم مافيه إلا مقعد طيارة بدون راكب .

كل ماأتمناه ويتمناه الشعب السعودي أنهم يشدون حيلهم في المباريات الجايه ويحرسون الباب زين هاللي كنه باب عمارة ماعليها حارس ..

على طاري الحارس ..

خويي يعرف له حارس مدرسة متوسّطة ..
كان وش حليله .. جيّدن بدراسته وماخذن تقدير يمشّي الحال ..
تخرّج ومثل العادة .. قعد في بيتهم ثلاث سنين يقشّر بصل مع امه كل يوم في المطبخ .

دوّر له وظيفه بس ماش مالقى .. آخر شي توضّف في مطعم كنتاكي وطردوه لأنهم كفشوه وهو يسرق كتشب ومايونيز لبيتهم ..
اشتغل بعدها سكورتي في بنك الراجحي وماجاز له الوضع .. اجل يداوم من تسع لخمس ثم يرجع للبيت ويرقد خمس ساعات ثم يصحى ويغسّل وجهه ثم يرجع للبنك هههههههه وش ذا الحااال .. والله لو اني مثله ان الفّ مطرحي تحت ابطي وارقد عند الصرّاف لين يفتحون الباب .. عاد صرافاتهم يازين برادها وياشين كزّتها للدراهم ..
ازين مافيها الديكور والا الصرف فيها مخيس .. اجل تدخّل بطاقة الصراف وتقعد ربع ساعة عشان تطلّع لك مية ريال .. كل شوي يسألك سؤال كنك قاعد تختبر اختبار علم نفس ..
لا واللي اشين منها إذا قالت لك الصراف ( ترى مافيه إلا 500 ريال .. تبيها والا اذلف ههههه ) ياشين هالحركة .. مدري ليش كل ماصارت لي احسّ ان الراجحي منحدّ يصرف للناس من امهات خمس هاللي عنده ويبي يحطهن في ظهر هالشعب المُخملي اللي بالعن له صامولة مايفكها إلا مفك حديد صلب ..

على طاري البنك ..

قد شفتوا مواطن ماعليه قرض ؟
طيب ان شفتوا مواطن ماعليه قرض فـ سلموني عليه وقولوا له : ان كان له نيّه ياخذ قرض فلا يستعجل .. يقولون والعلم من وكالة يقولون والرازق الله : ان البنوك بتخفّظ نسبة فائدة البنك من القرض من 5% إلى 20% !!

تدرون عاد انا ودي ان عندي بنك .. تدرون ليش ؟
عشان أحط نسبة الفائدة 80% ,, لأن المواطن مسكين .. مايتكلم .. مايشتكي .. مايقدر يقول شي .. أطلق شي يقدر يسويه يطلع من البنك ويقعد يلعّن ههههههههههه

أجل بنك آخذ منه قرض ويحط علي رسوم 500 ريال عشان الموظف وقّع على ورقة .. يقولون هذي رسوم بنكيّه ,, ماآدرش أأول حاقه لأني مواطن غلبااان !!

على طاري الحاقه ...
أحد محتاج يرفع له ملف وماناخذ عليه نسبه ؟

مركز تحميل المنتدى , مركز تقدر تحمّل فيه بعارين !



على طاري التحمّل .. امس ضايقن خلقي وماعاد قويت اتحمّل ..
أجل تجلس قدّام الشاشة تبي تشوف شي زين ويقعد هالشريط يشغلك كل شوي : أدعوا لي بالزوج الصالح اللي يفتح لي بيت ويجيب لي شغالة - بنت الرياض - ... أنا بنت عمري 19 وثلاث شهور أعاني من كبت عائلي وودي أعيش زي البنات وأغيّر جوّي ولو يحصل بعد تلاقون لي زوج مانيب مخالفة - سندريلا الغربية - ... توفي أبي وبقيت لي أمي وأنا وحيدة وأبحث عن شاب ولو مسيار أزبن أنا وياها في الملحق فوق ، رقم التلفون عند الكنترول - سميرة العدنية - ..

وهكذا

زفّة رايحه وزفّه جايه .. وبنيّن يفطّرون التسبد ويملون الشريط .. هذي تنوح وهذي تتوجّع .. هذي تقول ابي رجل وهذي تبي لو مسيار .. والضحية انا واشكالي اللي إذا صار قدّام الشاشه يقوطر ويسعبل من كل مكان .

المشكلة تشوف بس لو تبحث ماتلاقي أحد !
وإذا جيت للأمر الواقع قامت تتشرط عليك بشروط كنّك تبي تعيش معها طول عمرك وبتاخذ عليها صكّ !

مرّة لقيت رقم خطّابه عند مركز خدمات طالب على الجدار .. والله ان الخطابه ذيك بعد متويقعه صح ههههههه عارفتن ان اللي داخلين طالعين مع الباب حق المركز كلهم من نمونتي +18 وكل الاشرطة اللي بسيارته ماتحتسي إلا بالامور النازله .. تقول بالإعلان ( يوجد لدينا بنات متزوجات وبنات ماتزوجوا ... بكر ثيّب مطلقة . على حسب الطلب ) .. صار مطعم ذا .. ماعاد باقي إلا تكتب / عندنا مشاوي سورية وهمبرقر على الصاج
خذت الرقم ودقيت عليها .. عطيتها المواصفات وقلت كل شي عنّي .. اتوقع لو تسألني عن ( وين رحت ذاك اليوم ومن اني سهرت معه وكيف جلست بالصالة ، هو اني فوشحت والا قعدت على المركى اشوف التلفزيون ) اتوقع اني باوصّف لها حالي .. يابني دي خطاااابه

قلت وين ساكن .. وكم عمرك .. وهل تبيها سمرا والا باااضا كما النجفه .. وهل تحبها تضحك والا تبيها رسمية .. يلعن ام الاسئلة اللي جايتن معترضه . اجل احد يبي وحده كل شوي يترافس هو واياها ..
من ذاك اليوم وانا كل شوي اشوف الجوّال . اوّل مرة بحياتي احرص عليه واي رقم غريب يدق علي اتصل فيه ...
بعد اسبوع جاني اتصال من وحده .. وطرت بها وماعاد باقي إلا ادخل مع السماعة واخمها واحلف عليها اننا ذاك اليوم نتعشى سوا بالنافورة دام العيال نايمين <<-- هذي مشكلة اللي يسمعون بالعرس وتصريف البزران ذيك الليلة .. كل مابغت تحتسي رديت وقلت : تراي ان شالله حريص على أننا نكون بيت عائلي حلو يجمعنا .. وكل مابغت تحتسي طمرت بوجهها وقمت ارطرط بذا الحتسي المارج ههههههه .. آخر شي قفلت معها وقالت : تراي غلطانه الله يهديك .. انا ذيك اللحظة ماعاد قويت اشيل ساقي اليمين عشانه قد جاه شدّ عضلي من اربع سنين وكل شوي يرقل .. هو اني العّن الخطّابه ؟ هو اني اعرض عليها العرس واعطيها البرنت حقي وارسل لها صورتي وسائط وانا راقي نخلتنا البرحيه بالمزرعه ؟ .. هو اني والا هو اني هههههه .. انقطعت المكالمة وانقطع حبليَ السرّي وانقعطت حبال حبي واوتار قلبيَ المفتول ..

شريط القناة يونّ والشباب يونّ والبنيّات يبن رجاجيل .. والحال يعلمها الله !

[صدى الصمت]

أمي تسلم عليكم وتقول ترى عندي مكينة خياطة سنجر يوم حطت يدها عليها قامت تنتفض ، أحد له نظر

توني أدري أننا شعب مخفّه ، أول كنت أشك وآلحين تأكدت يوم شفت لي كم عجوز متبطحه على الساعة 12 ونص بسوق حراج بن قاسم جالسين يبيعون مكاين خياطة ..
أجل حرمتن وش كبرها وبرقعها مظهرن نص خدّها اللي كله ثواليل وسهرانه عشان تبيع مكينة خياطة ههههههههههههه
الله يصلح العطا بس والا ذي عقول ..

اللي طلّع الإشاعة باتَ قريرَ العين وحط الدراهم بجيبه والمواطن الضعيّف كلها حارة محترّه وحطها في تسبده والمرّة الجاية فتّح عقلك قبل تتهور ويكفي عذاب أسهم ومساهمات ومشاريع وهمية !

خنبقيشن الاولى لاقت قبول . وهالخنبقيشن هي جزو ثاني للاوله وعساها تدفّ خويتها وتسلم من شعيط ومعيط لايشذبون ظهرها ..

رحت قبل فترة للشرقية ومن طلعت من الخرج وانا معلّق صروال السباحة على الدريشه عشان يدرون اني قروي ويفتحون لي الخط ومايدققون على رخصتي واستمارتي بالتفتيش ..
ومن طلعت من ديرتنا وانا قلبي مع الهاف مون ومتشطرتن روحي تبي تشم هواهم ونفسي بسمكهم اللي كله شوك وعيني ترفّ وتروح وتجي تبي تكحّل جفونها ..
ويوم اقبلت عليها جاني مخرجن يقول تبي " الدمام " والا تبي " البحرين " ؟ ,، وكذا يتهيء لي ان واحدن يشّر لي ولابسن ضيّق يقولت تعال ترى عندنا مساج ! .. وانا اللي اصدّ عن مخرج البحرين واتنافض من الروعه اخاف احد يشوفني ثم يخليني حتسيتن في فمه عند الشيبان بالديرة !
دخلت الدمام واخذت لي شقه ومصع من ظهري 125 ريال ، مكيّفها مايشتغل إلا حار وان شغلت المروحة قامت تقرقع وان دورت لي ثلاجة عشان أفتح بابها علي عشان تبرّد لقيتهم فاصلينها عشان ماتسرف ويبي لها اربعة ايام عشان يشتغل برادها وان فتحت التلفزيون أبي أشوف شي ماطلعت إلا قنوات السعودية ووحده منها موشوشه عشانهم يطلّعون بالاخبار حريم حاطين مكياج !
اليوم الثاني .. تعرفت لي على راعي محل سمك وقلت له ابيك تجينا بالديرة ونعطيك كرتونين تمر صقعي ونفرّجك على بقرنا ونخليك تشوف شلون تولد الناقة على الطبيعة ههههههه
عاد قعدت اسولف معه سوالفن طويله وطبينا بالغويط واستانس الشايب .. عاد بعض الشيبان ودك تسولف معه من السرّ وتحت عشان ينبسط يالله حسن الخاتمة بس ياكريم ..

عاد انا كل شوي ألمّح له اني مابعد اعرست واني مابرحت " بكر " واني قد تقدمت على 147 وظيفة حكومية ونطلوا ملفي بوجهي عشاني ماعرف احتسي مع المراجعين ويمكن افشّل مديرنا معهم .. حتى اني مرة رحت لوزارة التجارة ابي اتوظف كاتب ورد علي حق التوظيف يقول انت ماتصلح ابد ولسانك متبرّي منك يومه سمعني اقول للموظف يوم ماصلح معاملتي : وجهك كنه مغاط صروال دروش مقاس 13 .. أجل نص ساعة واقف على راسه ابيه يشوف ملفي ووجهه كامش ويابس يادافع البلا .
بعدين انت يالمدير انت ووجهك هاللي كنه ريال سلف من زينك آلحين يومك تردني .. أجل قاعدن بمكتب ومشغل التلفزيون وتتفرج على الاخبار ومزلبن المراجعين .. لا ومن زين الطبايع شفت لي من تحت طاولته ( ليّ شيشه ) .. اثاريه المليعين يشب ناره وقت الدوام ويشيّش <<-- اما عاد لو تدق علي الوزارة ويكافآوني ويوظفوني عندهم عشاني بلّغت عنه ويحطوني مكانه ههههههههههه

على طاري الوزارات والتوظيف ..

آلحين ورى ماتصير فيه حركة للعاطلين أن كل واحد يحجز له شايب وموظف حكومي وبيموت بعد فترة عشان أوّل مايموت يوظفونه مكانه وبكذا بتنقرض العطاله وترتاح الحكومة .. لأن اللي يموتون سنوياً من موظفين الحكومة أكثر من العاطلين .. وانا بحكم اني ساكنن بديرة وحمولتنا أكثر من البنقاليين اللي واقفين على شارع سلطانة ويروجون كروت مشفرة حقت رسيفر ستار سات فاللي أعرفهم من الشيبان اللي يشتغلون بوظايف حكومية سبعة .. واحد بالداخلية وولده مسجون بقضية سرقة اسطوانات غاز وواحد بوزارة التعليم ومايعرف يقرا وماعنده شهادة إلا حقت التطعيم وخمسة يشتغلون في وزارة التجارة وكلهم طفارى وأمنيتهم الوحيدة بالدنيا أنهم يفتحون محل ابو ريلين على شارع الابراج بحي السويدي !
لذلك أتقدم إلى مولاي خادم الحرمين الشريفين - حفظه الله - أنه يشوف لي صرفة ويوظفني أنا وعيال عمتي مكان هالسبعه اللي يتفتفون وباقي عليهم شوي ويطفون !

على طاري الموت ..

الموت الحمرْ يومك تشوف طخما مع واحدن شين ههههههههه
قسم بالله تحوم تسبدي ..
اجل داخلن قبل فترة سوق وادفّ عربيتن مافيها إلا كرتون صلصة واشوف لي ذيك اللي تشق الجبهه وتطرح الطير من السما مع واحدن شيييييين .. لا ويمشي مبوبز كان فيه فتاق !
وماسكن يدها ويتضاحكون وانا قلبي يفرك واقول في نفسي : سبحان من حطّ حظه مع هالوجه السمح !
سبحان الله .. الواحد بعض المرات يجيه حظّه لباب بيتهم .. وبعضهم يجيه حظّه بين رجليه وبعضهم يجيه حظّه في صوته وحلتزه ، والموت كل الموت يوم انك تصير اشهب الهب لاوجه ولاقفا وتجيك وحدتن تلامع كنها فنجال صيني ..

أجل واحدن مامعه شهادة ثم يقولون له عيال حارته : تعال العب معنا باتسر كورة والبس شورت وطلع ركبك السود وخل فخوذك الشهبا تظهر .. ثم يصير يفتّ الكورة ويعرف يلعب ثم يجون النادي وياخذونه ويعطونه المقسوم .. ثم يشتهر وينهبل راعي النادي ويغريه ويعطيه فلّه وموتر وراتب ..
وانا يالله الخيره .. لاكورة ولافلّه ولاموتر ولارويتب .
لا ويحطون صورته بالجريدة وهو في جمعية خيرية ويكتبون تحت الصورة : اللاعب الفلاني يزور الجمعية الفلانية بحضور مدير الجمعية وجمع غفير من الموظفين والإدارات وقد قام بتوزيع الهدايا على الحضور ..
والله الحظّ ..
لاشهادة ولاوجه وآخر شي طايرين به ..
لا وإذا دخل سوق قامت العالم تختبص عشانه مشهور واللي يصوّر معه واللي يبيه يوقّع على يده جعل اصابعه تكسمر ..
وآه ياقهر بس آه .. دايم تخليني وتروح لغيري !

والا ذاك اللي شبّ وشبشب ثم دق له مزمار وعود . ثم طاروا به العالم وصار مشهور وحلق سكسوكه ولبس مخصّر وطلع كنه سندويش طحينيه وكل يوم صورته بالصفحة الفنيّة وهو مع الفنانة مرام ولابسه من دون ملابس والا مع الفنانة أصاله وهي محتشمه ولابسه إلى فوق الركبة !

قبل يومين كنت نايم الصباح إلى حدود الساعة 11 .. ومادريت إلا امي جايتن تركض وتصايح علي وتطقّ الباب وماعاد باقي إلا تكسره وتشيله على ظهرها ..
وش فيك ياميمتي ؟
قالت : التلفون عليه واحدن يقول يبي يكلمك وانه يطري فلوس ومن هالحتسي ( امنية امي اني اصير تاجر وراعي دراهم .. ويوم سمعت طاري الدراهم انقطع قليبها وصارت تتخيل شكلي راكبن بنز ولابس كبك )
وانا اللي افزّ واشوف دربي بنص عين ..
رديت وصبحني بالخير ورديت عليه بمثله واحسن ..
قال : تراك ربحت معنا بطاقة فيزا وان شالله انك تبي تسحب المبلغ اللي تبي ورح وسافر واطمّر وناقز واخطم كل طريق ووسّع صدرك وترى معك بطاقة فيزا تقدر تكشخ بها قدّام الناس إذا فتحت محفظتك !
المشكلة انهم يدورون الطفارى عشان يلعبون عليهم ، واشوا ان عمي ياحبني له محذرني منهم اني ماأعطيهم وجه ..
قلت ياخي تراي طفران . لاوظيفة ولادراهم .. محسوب على المجتمع أني مواطن .. والصدز اني عايشن بمزرعتنا ومالي بطريق الاقتصـاد ذرّة !
ومن البيت للمسجد ومن المسجد للبيت !

وعلى طاري المسجد ! قد شفتوا هيئة تحاصر مسجد عشان تمسك عامل المسجد !

قبل ايام طلعت بروح اشري لي شورما . متوحّمن على اثنين شورما وعصير خلاط يخلط بطني ..
ويوم طلعت آلا جمس الهيئة واقفن عند باب المسجد .. قلت وراهم آلحين ذولي توهم يصلون العشا الساعة 12.30 !
وبحكم أني شاب سعودي مايحب يتدخل بشؤون غيره فـ رحت لهم وسألتهم وش عندكم واقفين
زلبني الشيخ اللي يسوق الجمس ورد علي واحدن من ربعه شكله توّه متعيّن على بند الأجور : تعرف العامل ؟
المشكلة انه يغسّل سيارتي وخفت اقول اني اعرفه ويكرفتوني معه ورى بشنطة الجمس .
قلت له وانا اتنافض : ماعرفه ماعرفه !
شوي ويطلعونه من غرفته والكلبش مدقوقن برجله والتفت علي وماعليه فنيله وسرّه ظاهرن مترين قدّام وعرقه واصلن عرقوبه ...
هو شافني بس وقام يبتسي ويناديني وانا اتصدد خفت ادخل بالجريمة !
نطلوه في ظهر موترهم ثم طلّعوا من بعده ومن داخل المسجد حرمتين .. وحدتن تلملم عباتها والثانية ظاهرتن خشتها وعليها طرقن خفيف .
قلت : ياساتر !
وش العلم يامناحي !
سألت المطوع مرتن ثانية بحكم اني مانيب احب اتدخل بمشاكل الناس : وش سالفتهم !
قال : هذا عامل مسجدكم لقينا عنده حرمتين يجيب لهم زباين وياخذ على الزبون ميتين !
قلت : هذا وهو آلحين يذّن بنا ويصلي بنا الظهر كل ماخذ له يومين !
امحق ديانة تدين بها ربك وتستمري عليها دينك ..

وصدق عمي ناصر يوم قال :

ماكل نخلة تنبت عوجا.. وبابن يجيك معه ريح سدّه واستريح
وترى اشين إذا بغيت تكتب خاتمه وتوهقت ههههههههههههههههه

وبحبكو


منقول

[ღدمُوع القَلبْღ]

نسايم باين عليك ثرثار وتحب السوالف
وش هالخبصه هع
و ربي أشوي وراسي يدوخ
ربي يسعدك ويونسك
ويعطيك ألف عافيه
تحيــاتي لك

[صدى الصمت]

هههههههههه

سلامة راسك دموع ههههه

نورتي المتصفح

[ســ الأحزان ــر]

عن جد ما فهمت

من موضوعك شنو غايتك من

هالطرح وهالكلام

عموما ربي يعطيك العافية

مشرفنا العزيز