قصه واقعيه رقم (1)

[صدى الصمت]

السلام عليكم ورحمة الله وبركاته


بعد التحيه / حبيت أروي قصه حصلت لي مع إحدى الفتيات


بسم الله نبدأ قبل كل شي أبغا أرمز لأسمي بحرف (خ) وأسم الفتاة (هـ)


في أحدى الأيام ذهبت إلا منطقة جده وأخذت أتجول في مناطقها الخلابه حتى وصلت بالصدفه إلا


مجمع خاص ببيع أجهزة الجوال...


أخذت أتلفت يمنةً ويسره حتى وجدت بالصدفه مكان مكينة صرافه وبقرب المكينه أناس مكتضه


فذهبت لها لأشاهد مالذي يجري في هذا المكان ففوجئت بوجد أناس على الرصيف يبيعون أرقام


الجوالات المميزه وغير المميزه .


بعدها خطر ببالي فكرة !!!!


ألا وهي أن أشتري رقم مميز وبعد عودتي أعرضه لمحلات الجوالات لعلي أجد فائده منهم .


لاأطيل عليكم بالكلام إلا أنني وجدت رقماً مميزاً لم أفارق صاحب الرقم حتى أشتريته منه بـ 1500


وبصراحه بقولها لكم بالعاميه الرقم روعه .


تعبت من الكلام بالغة العربيه الفصحى خلونا بالعاميه أزين


المهم أني رجعت لديرتي وعرضت رقم الجوال للمحلات وأستغربت بأن ولا واحد من المحلات يبي


وش تسوي يا (خ) وش تسوي مالك إلا أنك تعرض الرقم في الصحف المبوبه .


لما رحت للصحف وسألتهم عن السعر قالو لي الخط العادي بـ 20 ريال والخط العريض بـ 40 ريال


قلت والله يابلاش ومن زود الطناخه أعلنت بـ 40 ريال .


المهم أن الجريده ماتنزل إلا يوم الجمعه وأنا نزلت الإعلان يوم الثلاثاء .


ومن يوم الثلاثاء إلا يوم الجمعه وأنا على أحر من الجمر


لما جت الجمعه دقو علي أكثر من واحد لاكن مالله قسم أنهم يسومون سومه طيبه كلما أقول لهم


شاريه بـ 1500 علطول يسكرون المهم نمت بالليل وأنا متكدر الخاطر تخسرت هالدراهم على قلة


سنع .


شوي مادريت إلا والجوال يدق رديت


(خ) : ألو


(هـ) : سلام عليكم


خ : وعليكم السلام


هـ : امممممممم أنت عارض رقم للبيع


خ : أيه عارض


هـ : بكم حاده


خ : 2000 ريال


هـ : امممممممم طيب ممكن أرسل لك أرقام وعطني رايك فيهن


خ : أوكي مو مشكله أرسلي


شوي مادريت إلا وجتني رساله وفيها الأرقام المميزه بصراحه الأرقام مميزه وأحسن من رقمي لاكن


السعر مره عالي إحدى الأرقام حادته بـ 15000 ريال والثاني بـ 5000 المهم أنا لعب بليس براسي


وقلت ياولد البنت هي الي داقه عليك يعني هي الي ودها تتعرف


أنا من زود خبالي رحت ودقيت عليها


خ : ألو سلام عليكم


هـ : هلا وعليكم السلام هاه شفت الأرقام


خ : أيوالله شفتهن وروعه بس السعر غالي شوي


هـ : اممممممممم بالعكس مو غاليه هذا أقل سعر لهن بعد والله أني منقصه بقيمتهن.


خ : طيب أنتي من وين تجيبين هالأرقام


يبي يخش بس مايدري وش لون بحكم أنه أول تجربه له في عالم البنات.


هـ : أنا عندي أخوي يعرف واحد من شركة الإتصالات بالرياض ويجيب هالأرقام وأنا أسوقهن


خ : والله أنك منتي بسيطه طيب وش رايك أخلي رقمي عندك تعرضينه


هـ : لاوالله ماأقدر يذبحوني أهلي بعدين اممممممم ممكن أتكلم معك بحريه


ماصدقت على الله تقول هالكلمه


خ : أيوا قولي خوذي راحتك


المهم أنها قامت تقرق علي من هالسواليف لياما فر راسي من صوتها الي بصراحه رحت وطي معاه


سكرت الجوال بعد ماسولفت وأنا قامت تجيني الهواجيس يا (خ) وش تسوي خلك ذيب لاتروح


البنت منك وانت جالس تتفرج .


رحت أرسلت لها رساله .


خ : ممكن سؤال


هـ : آمر أسأل


خ : أنتي مرتبطه ولا لا


هـ : لا


خ : لاعلاقه زوجيه ولا علاقه عاطفيه


شوي يوم دقت علي بالجوال يوم أخوكم تبلعم مايدري وش يقول رديت عليها وقالت


هـ : لاعاطفيه ولا زوجيه ليش ؟


من زود دلاختي وثاني شي توي صاحي من النوم ماأدري وش أقول فقلت


خ : أوكي أنا والله تعبان مره مانمت ليامني صحيت أقولك ليش


هـ : أوكي رح نم سلام .


أنسدحت بفراشي وأنا أفكر وش الي أنت سويت ياخبل ليش تقول للبنت كذا هذا أسلوب واحد


يبي يتعرف.


المهم جلست أهوجس لحد الساعه 4 العصر .......





باقي القصه نكملها في الموضوع الجاي بشوف تحمسكم معاي إذا أنك متحمسين واجد فأنا كملتها


لكم وإذا أنكم مو متحمسين فأكتفي بالي كتبته
__________________

منقوله والله مو انا

[● ηo coммєηт ●]

تسلم ابو رشود
ياقوي يـــــا (خ)
بس مكانها مو هنا مكانها بمنتدى القصص .....

[ســ الأحزان ــر]

تسلم على هالقصة الرائعة

وحياك الله معانا

ولكن موضوعك قسمه المناسب

( قسم القصص )

[صدى الصمت]

هلا وغلا واشكركم على المرور

[أنيقة]

قصة رائعة يا أبو رشود أو نقول خ

يعطيك الف عافية